Mark 4
1 饜尵饜尠饜尫 饜尠饜崋饜崉饜崅饜尠 [饜尮饜尨饜崈饜尶饜崈] 饜尦饜尶饜尣饜尠饜尳饜尳 饜尰饜尠饜尮饜崈饜尵饜尠饜尳 饜尠饜崉 饜尲饜尠饜崅饜尨饜尮饜尳, 饜尵饜尠饜尫 饜尣饜尠饜尰饜尨饜崈饜尶饜尳 饜崈饜尮饜尯 饜尦饜尶 饜尮饜尲饜尲饜尠 饜尲饜尠饜尳饜尠饜尣饜尨饜尮饜尳饜崈 饜崋饜尮饜尰饜尶, 饜崈饜崊饜尠饜崈饜崊饜尨 饜尮饜尳饜尠 饜尣饜尠饜尰饜尨饜尮饜尭饜尠饜尳 饜尮饜尳 饜崈饜尯饜尮饜崁 饜尣饜尠饜崈饜尮饜崉饜尠饜尳 饜尮饜尳 饜尲饜尠饜崅饜尨饜尮饜尳; 饜尵饜尠饜尫 饜尠饜尰饜尰饜尠 饜崈饜崏 饜尲饜尠饜尳饜尠饜尣饜尨饜尮 饜崊饜尮饜尭饜崅饜尠 饜尲饜尠饜崅饜尨饜尮饜尳 饜尠饜尳饜尠 饜崈饜崉饜尠饜尭饜尠 饜崊饜尠饜崈. 2饜尵饜尠饜尫 饜尰饜尠饜尮饜崈饜尮饜尦饜尠 饜尮饜尳饜崈 饜尮饜尳 饜尣饜尠饜尵饜尶饜尯饜崏饜尲 饜尲饜尠饜尳饜尠饜尣 饜尵饜尠饜尫 饜尩饜尠饜尭 饜尮饜尲 饜尮饜尳 饜尰饜尠饜尮饜崈饜尨饜尮饜尳饜尠饜尮 饜崈饜尨饜尮饜尳饜尠饜尮: 3饜尫饜尠饜尶饜崈饜尨饜尮饜尭! 饜崈饜尠饜尮, 饜尶饜崅饜崅饜尠饜尳饜尳 饜崈饜尠 饜崈饜尠饜尮饜尠饜尳饜尦饜崈 饜尦饜尶 饜崈饜尠饜尮饜尠饜尳 饜崋饜崅饜尠饜尮饜崊饜尠 饜崈饜尨饜尮饜尳饜尠饜尲饜尲饜尠. 4饜尵饜尠饜尫 饜崊饜尠饜崅饜尭, 饜尲饜尮饜尭饜尭饜尠饜尳饜尨饜尮 饜崈饜尠饜尮饜崈饜崏, 饜崈饜尶饜尲 饜崅饜尠饜尮饜尫饜崉饜尮饜崈 饜尣饜尠饜尦饜崅饜尠饜尶饜崈 饜崋饜尠饜尶饜崅 饜崊饜尮饜尣, 饜尵饜尠饜尫 饜尩饜尨饜尲饜尶饜尳 饜崋饜尶饜尣饜尰饜崏饜崈 饜尵饜尠饜尫 饜崋饜崅饜尨饜崉饜尶饜尳 饜尭饜尠饜崉饜尠. 5饜尠饜尳饜尭饜尠饜崅饜尶饜尭~饜尭饜尠饜尳 饜尣饜尠饜尦饜崅饜尠饜尶饜崈 饜尠饜尳饜尠 饜崈饜崉饜尠饜尮饜尳饜尠饜尫饜尠饜尲饜尲饜尠, 饜尭饜尠饜崅饜尨饜尮 饜尳饜尮 饜尫饜尠饜尡饜尠饜尮饜尦饜尠 饜尠饜尮饜崅饜尭饜尠 饜尲饜尠饜尳饜尠饜尣饜尠, 饜尵饜尠饜尫 饜崈饜尶饜尳饜崈 饜尶饜崅饜崅饜尠饜尳饜尳, 饜尮饜尳 饜尭饜尮饜尪饜尨饜尮 饜尳饜尮 饜尫饜尠饜尡饜尠饜尮饜尦饜尠 饜尦饜尮饜尶饜崁饜尠饜尮饜尪饜崏饜崈 饜尠饜尮饜崅饜尭饜崏饜崈; 6饜尠饜崉 饜崈饜尶饜尳饜尳饜尮饜尳 饜尭饜尠饜尳 饜尶饜崅饜崅饜尮饜尳饜尳饜尠饜尳饜尦饜尮饜尳 饜尶饜崋饜尡饜崅饜尠饜尳饜尳, 饜尵饜尠饜尫 饜尶饜尳饜崉饜尨 饜尳饜尮 饜尫饜尠饜尡饜尠饜尮饜尦饜尠 饜崊饜尠饜尶饜崅饜崉饜尮饜尳饜崈, 饜尣饜尠饜尭饜尠饜尶饜崅饜崈饜尳饜崏饜尦饜尠. 7饜尵饜尠饜尫 饜崈饜尶饜尲 饜尣饜尠饜尦饜崅饜尠饜尶饜崈 饜尮饜尳 饜尭饜尠饜尶饜崅饜尳饜尶饜尳饜崈; 饜尵饜尠饜尫 饜尶饜崋饜尠饜崅饜崈饜崉饜尮饜尣饜尶饜尳 饜尭饜尠饜尮 饜尭饜尠饜尶饜崅饜尳饜尵饜尶饜崈 饜尵饜尠饜尫 饜尠饜崋饜崍饜尠饜崁饜尮饜尦饜尨饜尦饜尶饜尳 饜尭饜尠饜崉饜尠, 饜尵饜尠饜尫 饜尠饜尯饜崅饜尠饜尳 饜尳饜尮 饜尣饜尠饜崋. 8饜尵饜尠饜尫 饜崈饜尶饜尲 饜尣饜尠饜尦饜崅饜尠饜尶饜崈 饜尮饜尳 饜尠饜尮饜崅饜尭饜尠 饜尣饜崏饜尦饜尠 饜尵饜尠饜尫 饜尣饜尠饜崋 饜尠饜尯饜崅饜尠饜尳 饜尶饜崅饜崅饜尮饜尳饜尳饜尠饜尳饜尦饜崏 饜尵饜尠饜尫 饜崊饜尠饜尫饜崈饜尵饜尠饜尳饜尦饜崏, 饜尵饜尠饜尫 饜尡饜尠饜崅 饜尠饜尮饜尳 路饜尰路 饜尵饜尠饜尫 饜尠饜尮饜尳 路饜尵路 饜尵饜尠饜尫 饜尠饜尮饜尳 路饜崅路 9饜尵饜尠饜尫 饜尩饜尠饜尭: 饜崈饜尠饜尨饜尮 饜尫饜尠饜尡饜尠饜尮 饜尠饜尶饜崈饜崏饜尳饜尠 饜尫饜尠饜尶饜崈饜尵饜尠饜尳饜尦饜崏饜尳饜尠, 饜尣饜尠饜尫饜尠饜尶饜崈饜尵饜尠饜尮. 10饜尮饜尭 饜尡饜尮饜尭饜尨 饜崊饜尠饜崅饜尭 饜崈饜尶饜尳饜尦饜崅饜崏, 饜崋饜崅饜尨饜尫饜尶饜尳 饜尮饜尳饜尠 饜尭饜尠饜尮 饜尡饜尮 饜尮饜尳饜尠 饜尲饜尮饜尭 饜尭饜尠饜尮饜尲 饜崉饜崊饜尠饜尰饜尮饜尡饜尮饜尲 饜尭饜尮饜尪饜崏饜崈 饜尣饜尠饜尵饜尶饜尯饜崏饜尳饜崈. 11饜尵饜尠饜尫 饜尩饜尠饜尭 饜尮饜尲: 饜尮饜尪饜崊饜尮饜崈 饜尠饜崉饜尣饜尮饜尡饜尠饜尳 饜尮饜崈饜崉 饜尯饜尶饜尳饜尳饜尠饜尳 饜崅饜尶饜尳饜尠 饜尭饜尮饜尶饜尦饜尠饜尳饜尣饜尠饜崅饜尦饜尵饜崏饜崈 饜尣饜尶饜尦饜尮饜崈, 饜尮饜尭 饜尵饜尠饜尮饜尳饜尠饜尮饜尲 饜尭饜尠饜尮饜尲 饜尶饜崉饜尠 饜尮饜尳 饜尣饜尠饜尵饜尶饜尯饜崏饜尲 饜尠饜尰饜尰饜尠饜崉饜尠 饜崊饜尠饜尮饜崅饜尭饜尮饜尭, 12饜尨饜尮 饜崈饜尠饜尮饜崍饜尠饜尳饜尦饜尠饜尳饜崈 饜崈饜尠饜尮饜崍饜尠饜尮饜尳饜尠 饜尵饜尠饜尫 饜尳饜尮 饜尣饜尠饜尶饜尲饜尵饜尠饜尮饜尳饜尠, 饜尵饜尠饜尫 饜尫饜尠饜尶饜崈饜尵饜尠饜尳饜尦饜尠饜尳饜崈 饜尫饜尠饜尶饜崈饜尵饜尠饜尮饜尳饜尠 饜尵饜尠饜尫 饜尳饜尮 饜崋饜崅饜尠饜尭饜尵饜尠饜尮饜尳饜尠, 饜尮饜尡饜尠饜尮 饜崍饜尠饜尳 饜尣饜尠饜崊饜尠饜尳饜尦饜尵饜尠饜尮饜尳饜尠 饜崈饜尮饜尯 饜尵饜尠饜尫 饜尠饜崋饜尰饜尨饜崉饜尠饜尮饜尳饜尦饜尠饜尶 饜尮饜尲 饜崋饜崅饜尠饜崊饜尠饜尶饜崅饜尫饜崉饜尨饜尮饜崈. 13饜尵饜尠饜尫 饜尩饜尠饜尭 饜尦饜尶 饜尮饜尲: 饜尳饜尮 饜崊饜尮饜崉饜尶饜尭 饜尭饜崏 饜尣饜尠饜尵饜尶饜尯饜崏饜尳, 饜尵饜尠饜尫 饜崍饜尠饜尮饜崊饜尠 饜尠饜尰饜尰饜崏饜崈 饜尭饜崏饜崈 饜尣饜尠饜尵饜尶饜尯饜崏饜尳饜崈 饜尯饜尶饜尳饜尳饜尨饜尮饜尭? 14饜崈饜尠 饜崈饜尠饜尮饜尵饜尠饜尳饜尦饜崈 饜崊饜尠饜尶饜崅饜尦 饜崈饜尠饜尮饜尵饜尮饜尭. 15饜尠饜尭饜尭饜尠饜尳 饜尭饜尠饜尮 饜崊饜尮饜尭饜崅饜尠 饜崊饜尮饜尣 饜崈饜尮饜尳饜尦, 饜尭饜尠饜崅饜尨饜尮 饜崈饜尠饜尮饜尠饜尦饜尠 饜尭饜尠饜崉饜尠 饜崊饜尠饜尶饜崅饜尦, 饜尵饜尠饜尫 饜尭饜尠饜尳 饜尣饜尠饜尫饜尠饜尶饜崈饜尵饜尠饜尳饜尦 饜尶饜尳饜尯饜尠饜崅饜尵饜尠饜尳饜崈, 饜崈饜尶饜尳饜崈 饜尩饜尮饜尲饜尮饜尭 饜崈饜尠饜崉饜尠饜尳饜尠饜崈 饜尵饜尠饜尫 饜尶饜崈饜尳饜尮饜尲饜尮饜尭 饜崊饜尠饜尶饜崅饜尦 饜尭饜尠饜崉饜尠 饜尮饜尳饜崈饜尠饜尮饜尠饜尳饜崏 饜尮饜尳 饜尫饜尠饜尮饜崅饜崉饜尠饜尲 饜尮饜尪饜尨. 16 饜尵饜尠饜尫 饜崈饜尮饜尳饜尦 饜崈饜尠饜尲饜尠饜尰饜尨饜尮饜尯饜崏 饜尭饜尠饜尮 饜尠饜尳饜尠 饜崈饜崉饜尠饜尮饜尳饜尠饜尫饜尠饜尲饜尲饜尠 饜崈饜尠饜尮饜尠饜尳饜尠饜尳饜崈, 饜尭饜尠饜尮饜尨饜尮 饜尭饜尠饜尳 饜尫饜尠饜尶饜崈饜尵饜尠饜尳饜尦 饜尭饜尠饜崉饜尠 饜崊饜尠饜尶饜崅饜尦, 饜崈饜尶饜尳饜崈 饜尲饜尮饜尭 饜崋饜尠饜尫饜尨饜尦饜尠饜尮 饜尳饜尮饜尲饜尠饜尳饜尦 饜尮饜崉饜尠 17饜尵饜尠饜尫 饜尳饜尮 饜尫饜尠饜尡饜尠饜尳饜尦 饜崊饜尠饜尶饜崅饜崉饜尮饜尳饜崈 饜尮饜尳 饜崈饜尮饜崈, 饜尠饜尯 饜崍饜尨饜尮饜尰饜尠饜崍饜尠饜尮饜崅饜尡饜尠饜尮 饜崈饜尮饜尳饜尦; 饜尭饜尠饜尭饜崅饜崏饜尫, 饜尡饜尮饜尭饜尨 饜尩饜尮饜尲饜尮饜尭 饜尠饜尣饜尰饜崏 饜尠饜尮饜尭饜尭饜尠饜尶 饜崊饜崅饜尠饜尯饜尵饜尠 饜尮饜尳 饜尭饜尮饜崈 饜崊饜尠饜尶饜崅饜尦饜尮饜崈, 饜崈饜尶饜尳饜崈 饜尣饜尠饜尲饜尠饜崅饜尪饜尵饜尠饜尳饜尦饜尠. 18饜尵饜尠饜尫 饜尭饜尠饜尮 饜崈饜尮饜尳饜尦 饜尭饜尠饜尮 饜尮饜尳 饜尭饜尠饜尶饜崅饜尳饜尶饜尳饜崈 饜崈饜尠饜尮饜尠饜尳饜尠饜尳饜崈, 饜尭饜尠饜尮 饜崊饜尠饜尶饜崅饜尦 饜尫饜尠饜尶饜崈饜尵饜尠饜尳饜尦饜尠饜尳饜崈, 19饜尵饜尠饜尫 饜崈饜尠饜尶饜崅饜尣饜崏饜崈 饜尭饜尮饜尪饜崏饜崈 饜尰饜尮饜尡饜尠饜尮饜尳饜尠饜尮饜崈 饜尵饜尠饜尫 饜尠饜崋饜尲饜尠饜崅饜尪饜尨饜尮饜尳饜崈 饜尣饜尠饜尡饜尨饜尮饜尳饜崈 饜尵饜尠饜尫 饜尭饜尠饜尮 饜尡饜尮 饜尭饜尠饜崉饜尠 饜尠饜尳饜尭饜尠饜崅 饜尰饜尶饜崈饜崉饜尵饜尶饜崈 饜尮饜尳饜尳饜尠饜崉饜尣饜尠饜尣饜尣饜尠饜尳饜尦饜尠饜尳饜崈 饜尠饜崋饜崍饜尠饜崁饜尵饜尠饜尳饜尦 饜尭饜尠饜崉饜尠 饜崊饜尠饜尶饜崅饜尦, 饜尵饜尠饜尫 饜尠饜尯饜崅饜尠饜尳饜尠饜尰饜尠饜尶饜崈 饜崊饜尠饜尮饜崅饜尭饜尮饜尭. 20饜尵饜尠饜尫 饜尭饜尠饜尮 饜崈饜尮饜尳饜尦 饜尭饜尠饜尮 饜尠饜尳饜尠 饜尠饜尮饜崅饜尭饜尠饜尮 饜尭饜尮饜尪饜尠饜尮 饜尣饜崏饜尦饜崏饜尳 饜崈饜尠饜尮饜尠饜尳饜尠饜尳饜崈, 饜尭饜尠饜尮饜尨饜尮 饜尫饜尠饜尶饜崈饜尵饜尠饜尳饜尦 饜尭饜尠饜崉饜尠 饜崊饜尠饜尶饜崅饜尦 饜尵饜尠饜尫 饜尠饜尳饜尦饜尳饜尮饜尲饜尠饜尳饜尦 饜尵饜尠饜尫 饜尠饜尯饜崅饜尠饜尳 饜尡饜尠饜尮饜崅饜尠饜尳饜尦, 饜尠饜尮饜尳 路饜尰路 饜尵饜尠饜尫 饜尠饜尮饜尳 路饜尵路 饜尵饜尠饜尫 饜尠饜尮饜尳 路饜崅路 21饜尵饜尠饜尫 饜尩饜尠饜尭 饜尦饜尶 饜尮饜尲: 饜尮饜尡饜尠饜尮 饜尰饜尶饜尯饜尠饜崅饜尳 饜尩饜尮饜尲饜尮饜尭 饜尦饜尶饜尭饜尨 饜尨饜尮 饜尶饜崋 饜尲饜尨饜尰饜尠饜尳 饜崈饜尠饜崉饜尵饜尠饜尮饜尦饜尠饜尶 饜尠饜尮饜尭饜尭饜尠饜尶 饜尶饜尳饜尦饜尠饜崅 饜尰饜尮饜尣饜崅? 饜尳饜尮饜尶 饜尨饜尮 饜尠饜尳饜尠 饜尰饜尶饜尯饜尠饜崅饜尳饜尠饜崈饜崉饜尠饜尭饜尠饜尳 饜崈饜尠饜崉饜尵饜尠饜尮饜尦饜尠饜尶? 22饜尳饜尮饜尫 饜尠饜尰饜尰饜尮饜崈 饜尮饜崈饜崉 饜崍饜尠 饜崋饜尶饜尰饜尣饜尮饜尳饜尮饜崈 饜尭饜尠饜崉饜尨饜尮 饜尳饜尮 饜尣饜尠饜尡饜尠饜尮饜崅饜尫饜崉饜尵饜尠饜尮饜尦饜尠饜尶: 饜尳饜尮饜尫 饜崊饜尠饜崅饜尭 饜尠饜尳饜尠饜尰饜尠饜尶饜尣饜尳, 饜尠饜尯 饜尨饜尮 饜崈饜崊饜尮饜尯饜尶饜尳饜尭 饜崊饜尠饜尮饜崅饜尭饜尠饜尮. 23饜尵饜尠饜尡饜尠饜尮 饜崍饜尠饜崈 饜尫饜尠饜尡饜尠饜尮 饜尠饜尶饜崈饜崏饜尳饜尠 饜尫饜尠饜尶饜崈饜尵饜尠饜尳饜尦饜崏饜尳饜尠, 饜尣饜尠饜尫饜尠饜尶饜崈饜尵饜尠饜尮. 24饜尵饜尠饜尫 饜尩饜尠饜尭 饜尦饜尶 饜尮饜尲: 饜崈饜尠饜尮饜崍饜尮饜尭, 饜崍饜尠 饜尫饜尠饜尶饜崈饜尨饜尮饜尭! 饜尮饜尳 饜尭饜尮饜尪饜尠饜尮饜尨饜尮 饜尲饜尮饜崉饜尠饜尭 饜尲饜尮饜崉饜尮饜尭, 饜尲饜尮饜崉饜尠饜尦饜尠 饜尮饜尪饜崊饜尮饜崈 饜尵饜尠饜尫 饜尡饜尮饜尠饜尶饜尯饜尠饜尦饜尠 饜尮饜尪饜崊饜尮饜崈 饜尭饜尠饜尮饜尲 饜尣饜尠饜尰饜尠饜尶饜尡饜尵饜尠饜尳饜尦饜尠饜尲. 25饜尶饜尳饜崉饜尨 饜尭饜尮饜崈饜崍饜尠饜尲饜尲饜尨饜尫 饜崈饜尠饜尨饜尮 饜尫饜尠饜尡饜尠饜尮饜尭 饜尣饜尮饜尡饜尠饜尦饜尠 饜尮饜尲饜尲饜尠; 饜尵饜尠饜尫 饜崈饜尠饜尨饜尮 饜尳饜尮 饜尫饜尠饜尡饜尠饜尮饜尭 饜尵饜尠饜尫 饜尭饜尠饜崉饜尨饜尮 饜尫饜尠饜尡饜尠饜尮饜尭 饜尠饜崋饜尳饜尮饜尲饜尠饜尦饜尠 饜尮饜尲饜尲饜尠. 26饜尵饜尠饜尫 饜尩饜尠饜尭: 饜崈饜崊饜尠 饜尮饜崈饜崉 饜尭饜尮饜尶饜尦饜尠饜尳饜尣饜尠饜崅饜尦饜尮 饜尣饜尶饜尦饜尮饜崈, 饜崈饜崊饜尠饜崈饜崊饜尨 饜尵饜尠饜尡饜尠饜尮 饜尲饜尠饜尳饜尳饜尠 饜崊饜尠饜尮饜崅饜崁饜尮饜尭 饜崋饜崅饜尠饜尮饜崊饜尠 饜尠饜尳饜尠 饜尠饜尮饜崅饜尭饜尠. 27饜尵饜尠饜尫 饜崈饜尰饜尨饜崁饜尮饜尭 饜尵饜尠饜尫 饜尶饜崅饜崅饜尨饜尮饜崈饜尮饜尭 饜尳饜尠饜尫饜崉 饜尵饜尠饜尫 饜尦饜尠饜尣饜尠, 饜尵饜尠饜尫 饜尭饜尠饜崉饜尠 饜崋饜崅饜尠饜尮饜崊 饜尯饜尨饜尮饜尳饜尮饜尭 饜尵饜尠饜尫 饜尰饜尮饜尶饜尦饜尮饜尭 饜崈饜崊饜尨 饜尳饜尮 饜崊饜尠饜尮饜崉 饜尮饜崈. 28饜崈饜尮饜尰饜尡饜崏 饜尠饜尶饜尯 饜尠饜尮饜崅饜尭饜尠 饜尠饜尯饜崅饜尠饜尳 饜尡饜尠饜尮饜崅饜尮饜尭: 饜崋饜崅饜尶饜尲饜尮饜崈饜崉 饜尣饜崅饜尠饜崈, 饜尭饜尠饜尭饜崅饜崏饜尫 饜尠饜尫饜崈, 饜尭饜尠饜尭饜崅饜崏饜尫 饜崋饜尶饜尰饜尰饜尮饜尭 饜尯饜尠饜尶饜崅饜尳饜尮饜崈 饜尮饜尳 饜尭饜尠饜尲饜尲饜尠 饜尠饜尫饜崈饜尠. 29饜尭饜尠饜尳饜尶饜尫 饜尡饜尮饜尭饜尨 饜尠饜崉饜尣饜尮饜尡饜尠饜尦饜尠 饜尠饜尯饜崅饜尠饜尳, 饜崈饜尶饜尳饜崈 饜尮饜尳饜崈饜尠饜尳饜尦饜尨饜尮饜尭 饜尣饜尮饜尰饜尭饜尠, 饜尶饜尳饜崉饜尨 饜尠饜崉饜尮饜崈饜崉 饜尠饜崈饜尠饜尳饜崈. 30饜尵饜尠饜尫 饜尩饜尠饜尭: 饜崍饜尨 饜尣饜尠饜尰饜尨饜尮饜尯饜崏饜尲 饜尭饜尮饜尶饜尦饜尠饜尳饜尣饜尠饜崅饜尦饜尵饜尠 饜尣饜尶饜尦饜尮饜崈, 饜尠饜尮饜尭饜尭饜尠饜尶 饜尮饜尳 饜崍饜尮饜尰饜尨饜尮饜尯饜尠饜尮 饜尣饜尠饜尵饜尶饜尯饜崏饜尳 饜尣饜尠饜尡饜尠饜尮饜崅饜尠饜尲 饜尭饜崏? 31饜崈饜崊饜尨 饜尯饜尠饜尶饜崅饜尳饜崏 饜崈饜尮饜尳饜尠饜崁饜尮饜崈, 饜尭饜尠饜崉饜尨饜尮 饜尭饜尠饜尳 饜崈饜尠饜尮饜尠饜尦饜尠 饜尠饜尳饜尠 饜尠饜尮饜崅饜尭饜尠, 饜尲饜尮饜尳饜尳饜尮饜崈饜崉 饜尠饜尰饜尰饜尠饜尮饜尪饜尨 饜崋饜崅饜尠饜尮饜崊饜尨 饜尮饜崈饜崉 饜尭饜尮饜尪饜尨 饜尠饜尳饜尠 饜尠饜尮饜崅饜尭饜尠饜尮; 32饜尵饜尠饜尫 饜尭饜尠饜尳 饜崈饜尠饜尮饜尠饜尦饜尠, 饜尶饜崅饜崅饜尮饜尳饜尳饜尮饜尭 饜尵饜尠饜尫 饜崊饜尠饜尮饜崅饜尭饜尮饜尭 饜尠饜尰饜尰饜尠饜尮饜尪饜尨 饜尣饜崅饜尠饜崈饜尨 饜尲饜尠饜尮饜崈饜崉 饜尵饜尠饜尫 饜尣饜尠饜崉饜尠饜尶饜尵饜尮饜尭 饜尠饜崈饜崉饜尠饜尳饜崈 饜尲饜尮饜尯饜尮饜尰饜尠饜尳饜崈, 饜崈饜崊饜尠饜崈饜崊饜尨 饜尲饜尠饜尣饜尶饜尳 饜尶饜崋 饜崈饜尯饜尠饜尦饜尠饜尶 饜尮饜崈 饜崋饜尶饜尣饜尰饜崏饜崈 饜尫饜尮饜尲饜尮饜尳饜尮饜崈 饜尣饜尠饜尡饜尠饜尶饜尠饜尳. 33饜尵饜尠饜尫 饜崈饜崊饜尠饜尰饜尨饜尮饜尯饜尠饜尮饜尲 饜尲饜尠饜尳饜尠饜尣饜尠饜尮饜尲 饜尣饜尠饜尵饜尶饜尯饜崏饜尲 饜崅饜崏饜尦饜尮饜尦饜尠 饜尦饜尶 饜尮饜尲 饜尭饜尠饜崉饜尠 饜崊饜尠饜尶饜崅饜尦, 饜崈饜崊饜尠饜崈饜崊饜尨 饜尲饜尠饜尫饜崉饜尨饜尦饜尶饜尳 饜尫饜尠饜尶饜崈饜尵饜崏饜尳. 34饜尮饜尭 饜尮饜尳饜尶饜尫 饜尣饜尠饜尵饜尶饜尯饜崏饜尳 饜尳饜尮 饜崅饜崏饜尦饜尮饜尦饜尠 饜尮饜尲, 饜尮饜尭 饜崈饜尶饜尳饜尦饜崅饜崏 饜崈饜尮饜崁饜崏饜尳饜尵饜尠饜尲 饜崈饜尨饜尮饜尳饜尠饜尮饜尲 饜尠饜尳饜尦饜尡饜尠饜尳饜尦 饜尠饜尰饜尰饜尠饜崉饜尠. 35饜尵饜尠饜尫 饜尩饜尠饜尭 饜尦饜尶 饜尮饜尲 饜尮饜尳 饜尵饜尠饜尮饜尳饜尠饜尲饜尲饜尠 饜尦饜尠饜尣饜尠 饜尠饜崉 饜尠饜尳饜尦饜尠饜尳饜尠饜尫饜崉饜尵饜尠 饜尭饜尠饜尳 饜崊饜尠饜尶饜崅饜尭饜尠饜尳饜尠饜尲饜尲饜尠: 饜尶饜崈饜尰饜尨饜尮饜尭饜尠饜尲 饜尵饜尠饜尮饜尳饜尮饜崈 饜崈饜崉饜尠饜尦饜尮饜崈. 36饜尵饜尠饜尫 饜尠饜崋饜尰饜尨饜崉饜尠饜尳饜尦饜尠饜尳饜崈 饜尭饜崏 饜尲饜尠饜尳饜尠饜尣饜尨饜尮饜尳 饜尠饜尳饜尦饜尳饜尨饜尲饜尶饜尳 饜尮饜尳饜尠 饜崈饜崊饜尨 饜崊饜尠饜崈 饜尮饜尳 饜崈饜尯饜尮饜崁饜尠; 饜尵饜尠饜尫 饜尭饜尠饜尳 饜尠饜尳饜尭饜尠饜崅饜尠 饜崈饜尯饜尮饜崁饜尠 饜崊饜尨饜崈饜尶饜尳 饜尲饜尮饜尭 饜尮饜尲饜尲饜尠. 37饜尵饜尠饜尫 饜崊饜尠饜崅饜尭 饜崈饜尯饜尶饜崅饜尠 饜崊饜尮饜尳饜尦饜尮饜崈 饜尲饜尮饜尯饜尮饜尰饜尠 饜尵饜尠饜尫 饜崊饜尨饜尣饜崏饜崈 饜崊饜尠饜尰饜崉饜尮饜尦饜尨饜尦饜尶饜尳 饜尮饜尳 饜崈饜尯饜尮饜崁, 饜崈饜崊饜尠饜崈饜崊饜尨 饜尮饜崉饜尠 饜尵饜尶饜尭饜尠饜尳 饜尣饜尠饜崋饜尶饜尰饜尰饜尳饜崏饜尦饜尠. 38饜尵饜尠饜尫 饜崊饜尠饜崈 饜尮饜崈 饜尠饜尳饜尠 饜尳饜崏饜崉饜尮饜尳 饜尠饜尳饜尠 饜崊饜尠饜尣饜尣饜尠饜崅饜尵饜尠 饜崈饜尰饜尨饜崁饜尠饜尳饜尦饜崈, 饜尵饜尠饜尫 饜尶饜崅饜崅饜尠饜尮饜崈饜尮饜尦饜尨饜尦饜尶饜尳 饜尮饜尳饜尠 饜尵饜尠饜尫 饜尩饜尨饜尭饜尶饜尳 饜尦饜尶 饜尮饜尲饜尲饜尠: 饜尰饜尠饜尮饜崈饜尠饜崅饜尮, 饜尳饜尮饜尶 饜尯饜尠饜崅饜尠 饜尭饜尶饜尯 饜尭饜尮饜尪饜尨饜尮 饜崋饜崅饜尠饜尩饜尮饜崈饜崉饜尳饜尠饜尲? 39饜尵饜尠饜尫 饜尶饜崅饜崅饜尨饜尮饜崈饜尠饜尳饜尦饜崈 饜尣饜尠饜崈饜崏饜尯 饜崊饜尮饜尳饜尦饜尠 饜尵饜尠饜尫 饜尩饜尠饜尭 饜尦饜尶 饜尲饜尠饜崅饜尨饜尮饜尳: 饜尣饜尠饜崈饜尰饜尠饜崊饜尠饜尮, 饜尠饜崋饜尦饜尶饜尲饜尡饜尳! 饜尵饜尠饜尫 饜尠饜尳饜尠饜崈饜尮饜尰饜尠饜尮饜尦饜尠 饜崈饜尠 饜崊饜尮饜尳饜尦饜崈 饜尵饜尠饜尫 饜崊饜尠饜崅饜尭 饜崊饜尮饜崈 饜尲饜尮饜尯饜尮饜尰. 40饜尵饜尠饜尫 饜尩饜尠饜尭 饜尦饜尶 饜尮饜尲: 饜尦饜尶饜崍饜尨 饜崋饜尠饜尶饜崅饜尫饜崉饜尠饜尮 饜崈饜尮饜尵饜尶饜尭 饜崈饜崊饜尠? 饜崍饜尠饜尮饜崊饜尠 饜尳饜尮 饜尳饜尠饜尶饜尫 饜尫饜尠饜尡饜尠饜尮饜尭 饜尣饜尠饜尰饜尠饜尶饜尡饜尨饜尮饜尳? 41饜尵饜尠饜尫 饜崏饜尫饜崉饜尨饜尦饜尶饜尳 饜崈饜尮饜崈 饜尠饜尣饜尮饜崈 饜尲饜尮饜尯饜尮饜尰 饜尵饜尠饜尫 饜尩饜尨饜尭饜尶饜尳 饜尦饜尶 饜崈饜尮饜崈 饜尲饜尮饜崈饜崈饜崏: 饜崍饜尠饜崈 饜尭饜尠饜尳饜尳饜尶 饜崈饜尠 饜崈饜尮饜尵饜尠饜尮, 饜尶饜尳饜崉饜尨 饜尵饜尠饜尫 饜崊饜尮饜尳饜尦饜崈 饜尵饜尠饜尫 饜尲饜尠饜崅饜尨饜尮 饜尶饜崋饜尫饜尠饜尶饜崈饜尵饜尠饜尳饜尦 饜尮饜尲饜尲饜尠?
Copyright information for
Wulfila